Dansíþróttasamband Íslands hefur kosið Nicolo Barbizi og Söru Rós Jakobsdóttur frá Dansíþróttafélagi Hafnarfjarðar sem dansíþróttapar ársins 2020.
Nicolò Barbizi og Sara Rós Jakobsdóttir hafa dansað saman frá því í janúar árið 2016. Þau eru búsett í Aarhus í Danmörku þar sem þau stunda þjálfun og ferðast á danskeppnir um Evrópu og víðar. Þau keppa fyrir Íslands hönd og Dansíþróttafélag Hafnarfjarðar.
Árið 2020 var sérstakt ár vegna COVID-19 og féllu nánast allar keppnir niður í heiminum. Þau náðu þó að næla sér í Bikarmeistaratitil í standard dönsum á Íslandi áður en mótum var aflýst. Einnig náðu þau 3 sæti fullorðinna á Íslandsmeistaramótinu í latín dönsum. Þau voru svo heppin að ná að halda áfram æfingum allt árið þrátt fyrir erfiðar aðstæður. Öllum stórmótum var aflýst á árinu, fyrir utan Evrópumeistaramótið í 10 dönsum WDSF. Það var haldið í Aarhus í Danmörku í september sl.. Nicoló og Sara komust í undanúrslit og enduðu í 11. Sæti. Ekki var keppt um Íslandsmeistaratitil í þeirra aðal greinum, standard og 10 x dönsum vegna Covid19.
Þau náðu að keppa á nokkrum litlum keppnum í Danmörku þar sem að þau eru búsett. Það gerðu þau til að halda áfram að vinna að markmiðum sínum og ná framförum. Þau eru tilbúin í keppnirnar sem munu vonandi hefjast aftur árið 2021.
Besti árangur ársins 2020:
Bikarmeistarar í Standard dönsum DSÍ
Evrópumeistaramót 10 dansa – undanúrslit, 11. Sæti, WDSF.
Stjórn DSÍ óskar dansíþróttapari ársins 2020 til hamingju með árangurinn og bjarta framtíð
